Puno ang simbahan
Maraming deboto
Ngunit sarado ito
Bukas ang ilaw
Nagsisimba ang mga tao
Ngunit sarado ito
Bakit kamo?
Dahil sa bawat may pumasok,
mula ulo hangggang paa,
sinusuri't sinusukat ng mga
beteranong parokyano,
Nagtatanong, naninimbang:
Bakit sya nandito? Bakit ganyan ang kanyang suot? Bakit sya ang napiling pinuno ng organisasyon?
Nagtatanong na wari mo'y sila lang ang may karapatan sa kaligtasan at pagmamahal ng Panginoon.
Sarado ang simbahan
Puno ito ng mga banal na aso at santong kabayo.
Sarado dahil matigas at nakasara ang puso at isip ng mga taong layko.
